مەهاباد؛ دەستبەسەرکردنی خالید ئیلاهی لە لایەن هێزەکانی وەزارەتی ئیتلاعات

هەنگاو؛ شەممە ٨ی سەرماوەزی ٢٧٢٥ 

خالید ئیلاهی، هاووڵاتیی خەڵکی مەهاباد، لە لایەن هێزەکانی وەزارەتی ئیتلاعاتی کۆماری ئیسلامیی ئێرانەوە دەستبەسەر و بۆ شوێنێکی نادیار گواسترایەوە.

بەپێی ڕاپۆرتی گەیشتوو بە ڕێکخراوی مافی مرۆڤی هەنگاو، ڕۆژی پێنجشەممە ٦ی سەرماوەزی ٢٧٢٥ (٢٧ی نۆڤەمبەری ٢٠٢٥)، خالید ئیلاهی، خەڵکی مەهاباد لە لایەن هێزەکانی ئیدارەی ئیتلاعاتەوە دەستبەسەرکرا.

بە گوتەی سەرچاوە ئاگادارەکان، دەستبەسەرکردنی خالید ئیلاهی لە چواررێیانی ئازادیی شاری مەهاباد لە لایەن هێزەکانی وەزارەتی ئیتلاعاتی کۆماری ئیسلامیی ئێرانەوە ئەنجام دراوە.

تا کاتی نووسینەوەی ئەم ڕاپۆرتە، زانیاری ورد لەسەر هۆکارەکانی دەسبەسەرکردن، تۆمەتە ئاراستەکراوەکان بۆ سەر ئەو هاووڵاتییە و چارەنووسی، لەبەردەست نییە.