دەستبەسەرکرانی ئەسمەر حەمیدی، گۆرانیبێژی کورد و خەڵکی خوراسان لە لایەن هێزە ئەمنییەکان
هەنگاو؛ یەکشەممە ٩ی سەرماوەزی ٢٧٢٥
هێزە ئەمنییەکانی کۆماری ئیسلامی ئێران ئەسمەر حەمیدی، چالاکی فەرهەنگی و هونەرمەندی گەنجی کورد و خەڵکی شاری مانە سەمەلقان سەر بە پارێزگای خوراسانی باکووریان دەستبەسەر و بۆ شوێنێکی نادیاریان گواستەوە.
بە پێی ڕاپۆرتی گەیشتوو بە ڕێکخراویی مافی مرۆڤی هەنگاو، ڕۆژی شەممە ٨ی سەرماوەزی ٢٧٢٥ (٢٩ی نۆڤەمبری ٢٠٢٥)، هێزە ئەمنییەکانی کۆماری ئیسلامی ئێران هەڵیانکوتاوەتە سەر ماڵی ئەسمەر حەمیدی، چالاکی فەرهەنگی، گۆرانیبێژ و هونەرمەندی گەنج و خەڵکی شاری مانە سەمەلقان سەر بە پارێزگای خوراسانی باکوور و نابراویان دەستبەسەر کردووە.
بە وتەی سەرچاوە ئاگادارەکان، ئەم هونەرمەندە گەنجە پاش دەستبەسەرکران بۆ شوێنێکی نادیار گواستراوەتەوە و لاپەڕەی ئینستاگرامی ناوبراویش لە لایەن ناوەندەکانی ئەمنییەتی کۆماری ئیسلامی ئێران بلۆک کراوە.
ئەسمەر حەمیدی کە یەکێکە لە هونەرمەندانی گەنجی بواری موسیقای کوردی لە خوراسان و هەروەها لە ژنە چالاکەکانی بواری فەرهەنگییە و پێشتریش بە هۆی چالاکییە مەدەنییەکانی، بەشداری لە بەرنامەکانی فەرهەنگی و دەرخستنی ڕوانگەی ڕخنەگرانەی خۆی لە لایەن ناوەندەکانی ئەمنییەتی بانگ کرابوو.
تا کاتی داڕشتنی ئەم هەواڵە، زانیارییەکی ورد لە سەر هۆکارەکانی دەستبەسەرکران، ئەو تۆمەتانەی خراونەتە پاڵ ناوبراو و شوێنی هەڵگرتنی ئەسمەر حەمیدی لە بەر دەستدا نییە.
