بیجاڕ؛ دەستبەسەرکردن و نادیاریی چارەنووسی ئەحمەدڕەزا قەمەری، سامان محەممەدزادە و عەلی وەلیزادە
هەنگاو؛ دووشەممە ٦ی ڕێبەندانی ٢٧٢٥
سێ هاوڵاتیی کوردی خەڵکی بیجاڕ بە ناوەکانی ئەحمەدڕەزا قەمەری، سامان محەممەدزادە و عەلی وەلیزادە لە ١٨ ڕۆژ پێشەوە لەلایەن هێزە حکومەتییەکانی کۆماری ئیسلامیی ئێرانەوە دەستبەسەر کراون و تا ئێستا هیچ زانیارییەک لەسەر چارەنووسیان لەبەر دەستدا نییە.
بەپێی ڕاپۆرتی گەیشتوو بە ڕێکخراوی مافی مرۆڤی هەنگاو، ئێوارەی پێنجشەممە ١٨ی بەفرانباری ٢٧٢٥ (٨ی ژانوییەی ٢٠٢٦)، ئەحمەدڕەزا قەمەری، سامان محەممەدزادە و عەلی وەلیزادە، سێ هاوڵاتیی خەڵکی بیجاڕ لەلایەن هێزە حکومەتییەکانەوە و بەبێ نیشاندانی هیچ جۆرە بەڵگەیەکی دادوەری دەستبەسەر کران.
بە وتەی سەرچاوە ئاگادارەکان، ئەم سێ هاوڵاتییە دوای دەستبەسەرکردن بۆ بەندیخانەی ناوەندیی سنە گواستراونەتەوە و بەدواداچوونی بنەماڵەکانیان تا ئێستا و سەرەڕای تێپەڕبوونی ١٨ ڕۆژ لە کاتی دەستبەسەرکردنیان بێئاکام ماوەتەوە.
تا کاتی ئامادەکردنی ئەم ڕاپۆرتە، زانیارییەکی ورد لەسەر ئەو تۆمەتانەی ئاڕاستەیان کراوە و چارەنووسی ئەم سێ هاوڵاتییە لەبەر دەستدا نییە.
