مەریوان؛ دەستبەسەرکران و ناڕوونی چارەنووسی کامیاب کەریمی
هەنگاو؛ دووشەممە ۲۷ی ڕێبەندانی ۲۷۲۵
کامیاب کەریمی، هاووڵاتیی کورد و خەڵکی شاری مەریوان، لە سەرەتای مانگی بەفرانبارەوە لە لایەن هێزەکانی کۆماری ئیسلامیی ئێران لەو شارە دەستبەسەر کراوە و تا ئێستا زانیارییەک لەسەر چارەنووسی لەبەر دەستدا نییە.
بەپێی ڕاپۆرتی گەیشتوو بە ڕێکخراوی مافی مرۆڤی هەنگاو، کامیاب کەریمی، هاووڵاتیی تەمەن ۱۹ ساڵ و خەڵکی مەریوان، ۵۴ ڕۆژی ڕابردووی لە بێدەنگیی چڕدا لە دەستبەسەرگە تێپەڕ کردووە.
بە وتەی سەرچاوەیەکی ئاگادار، ئەو گەنجە لە ماوەی ۵۴ ڕۆژی ڕابردوودا لە مافی چاوپێکەوتن لەگەڵ بنەماڵەکەی و مافە سەرەکییەکانی دیکەی خۆی بێبەش بووە و ئەگەری وەرگرتنی دانپێدانانی زۆرەملێ لە ناوبراو نیگەرانیی لێ کەوتووەتەوە.
کامیاب کەریمی، ڕۆژی چوارشەممە ۳ی بەفرانباری ۲۷۲۵ (۲۴ی دیسەمبەری ۲۰۲۵)، لە ماڵی پووری لە مەریوان لە لایەن هێزە حکومەتییەکانەوە دەستبەسەر کرا و لە ڕێکەوتی ۱۸ی رێبەندان بۆ دەستبەسەرگەی ئیدارەی ئیتلاعاتی سنە گواسترایەوە.
