سنە؛ بەردەوامیی دەستبەسەرکرانی وریا موەید و هەیبەت موەید لە دەستبەسەرگەی ئیتڵاعاتدا
هەنگاو، سێشەممە ٢٨ی ڕێبەندانی ٢٧٢٥
وریا موەید و هەیبەت موەید دوو ئامۆزای خەڵکی سنە، لە سەرەتای مانگی ڕابردووەوە لەلایەن ئیدارەی ئیتڵاعاتی کۆماری ئیسلامیی ئێرانەوە دەستبەسەر کراون و هێشتا لە دەستبەسەرگەی ئەم ناوەندە حکومەتییەدا لەژێر گوشاردا ڕاگیراون.
بەپێی ڕاپۆرتە گەیشتووەکان بە ڕێکخراوی مافی مرۆڤی هەنگاو، هەیبەت موەید تەمەن ٤١ ساڵ و خەڵکی سنە لە ٥٢ ڕۆژ پێش ئێستاوە و وریا موەید، لە ٤٤ ڕۆژ پێش ئێستاوە دەستبەسەر کراون و هێشتا بە ناڕوونی لە دەستبەسەرگەی ئیدارەی ئیتڵاعاتی سنەدا ماونەتەوە.
بە وتەی سەرچاوە ئاگادارەکان، وریا موەید بەدەست کێشەی جەستەیییەوە دەناڵێنێت و ڕاگرتنی لە ژووری تاکەکەسیدا نیگەرانییەکانی سەبارەت بە تەندروستیی ناوبراو زیاتر کردووە. بنەماڵەی هەیبەت مویدیش زیاتر لە مانگێکە هیچ پەیوەندییەکیان لەگەڵیدا نەبووە.
ڕۆژی شەممە ٦ی بەفرانباری ئەمساڵ، هەیبەت موەید و لە ڕێکەوتی ١٤ی هەمان مانگدا وریا موەید لەلایەن هێزەکانی ئیدارەی ئیتڵاعاتەوە دەستبەسەر کران و بۆ دەستبەسەرگە گواسترانەوە. وریا موید پێشتریش بەهۆی چالاکییەکانیەوە پێشینەی دەستبەسەرکردن و بانگکرانی لەلایەن ناوەندە حکومەتییەکانەوە هەبووە.
