سەڵماس.. دەستبەسەرکرانی لاوێکی کورد لەلایەن ئیتلاعاتەوە
٣٠ سەرماوەز ٢٧١٦، ١٨:٤١
هەنگاو: لاوێکی کوردی خەڵکی سەڵماس لەلایەن هێزە ئیتلاعاتییەکانی ئەو شارەوە دەستبەسەر و بۆ شوێنێکی نادیار گوێزرایەوە.
بەپێی راپۆرتی ماڵپەڕی مافی مرۆڤیی "هەنگاو"، ڕۆژی شەممە ٢٧ی سەرماوەز، هێزە ئیتلاعاتییەکانی ڕێژیم هێرشیان کردە سەر خانووی هاووڵاتییەکی کورد و دەستبەسەریان کرد.
هەواڵنیری "هەنگاو" لەشاری سەڵماس ناسنامەی ئەو هاووڵاتییە کوردەی "خەلیل فەزڵی" تەمەن ١٩ ساڵ و کوڕی هاشم راگەیاندووە.
یەکێک لە نزیکانی خەلیل بە هەواڵنێری "هەنگاو"ی راگەیاند کە هەتا ئێستا هۆکاری دەستبەسەر کران و هەروەها شوێنی راگیرانی ناوبراو بۆ بنەماڵەکەی روون نەبووەتەوە و هەوڵەکانیان لەو پێناوەدا بێ ئاکام ماوەتەوە.
بە وتەی سەرچاوەیەکی ئاگادار، خەلیل دوای گەڕانەوە لە شاری سلێمانی دەستبەسەر کراوە.
ناوبراو بۆ ماوەی ٣ مانگ لە سلێمانی سەرقاڵی کریکاری بووە.
ئەو لاوە کوردە لە منداڵییەوە باوکی لە دەست داوە و بۆ دابین کردنی بژێوی ژیانی خێزانەکەی سەرقاڵی کرێکاری بووە و بەهۆی نەبوونی دەرەتانی کار لە ئێران سەردانی هەریمی کوردستانی کردووە.
