چوار هاووڵاتیی بۆکانی سزای ٢٠ ساڵ زیندانیان بەسەردا سەپێندرا

هەنگاو: چوار هاووڵاتیی خەڵکی بۆکان بە تۆمەتی چالاکیی مەزهەبی سەرجەم سزای ٢٠ ساڵ زیندانیان بۆ بڕایەوە. بەپێی ڕاپۆرتی "هەنگاو"، ٤ چالاکی مەزهەبی کوردی خەڵکی بۆکان کە مانگی ڕەزبەری ئەمساڵ لەلایەن هێزە ئیتلاعاتییەکانی ئەو شارەوە دەستبەسەر کرابوون هەرکامەیان سزای ٥ ساڵ زیندانیان بە سەردا سەپێندراوە. ئەو سزایە لەلایەن لقی یەکەمی دادگای شۆڕشی ئورمیە و بە تۆمەتی "چالاکی مەزهەبی" و "پڕوپاگەندە دژی نیزام" بەسەر ئەو چالاکانەدا سەپێندراوە. بەپێی ئەو حوکمە هەر یەک لە "یەعقووب نوورە، عەبدولغەفار ئاسوار، هەژار فارۆقی و کەماڵ عەلی ئەقدەم" سزای ٥ ساڵ زیندانیان بۆ براوەتەوە. هەواڵنێری هەنگاو لە شاری بۆکان رایگەیاند کە ئەو چوار هاووڵاتییە کوردە ئێستادا لە گرتووخانەی "دەریا"ی شاری ئورمیە ڕاگیراون و ماوەی حوکمەکەیان تێپەڕ دەکەن. ئەو چوار هاووڵاتییە کوردە ١٥ی رەزبەری ئەمساڵ هاوڕێ لەگەڵ چەندین هاووڵاتیی دیکە دەستبەسەر کران کە ئەونای دیکە پاش ماوەیەک ئازاد کرابوون.   تێلێگرامی هەنگاو فەیسبووکی هەنگاو