بانە / هێزە ئینتزامییەکان ئاگریان لە لێوارەکان بەردا و تەقەیان لە ژینگەپارێزان کرد +وێنە و بەڵگە
هەنگاو: ئاگرتێبەردانی دارستان و لێرەوارەکانی سنووری بانە لەلایەن هێزە ئینتزامییەکانی ئێران و تەقە لە چالاکانی ژینگەپارێز، ناڕەزایەتی ئەندامانی شورا و خەڵکی گوندی چۆمانی لێکەوتەوە.
بە پێێ ڕاپۆرتی (هەنگاو)، ڕۆژی یەکشەممە ٢١ی جۆزەردان، هێزەکانی هەنگی سنووری بانە، بە ئەنقەست لە سێ لاوە ئاگریان لە دارستان و لێرەوارەکانی گوندی چۆمان بەردا.
بە هۆی ئەو ئاگرکەوتنەوەوە ٥ هیکتار لە لێرەوارەکانی ناوچەکە سووتان و لە بەین چوون.
بە وتەی سەرچاوەیەکی ئاگادار، کاتێک خەڵک و چالاکانی ژینگەپارێز ویستوویانە ئاگرەکە بکوژێننەوە، لەلایەن چەکدارانی ئێرانەوە ڕێگرییان لێ کراوە و تەقەی ئاسمانییان کردووە.
ئەو کارەش بووەتە هۆی ئەوەی هەتا ئەندامانی شورا و پیاوماقوڵانی گوندی چۆمان بە نووسینی نامەیەک بۆ فەرماندارییی شاری بانە ناڕەزایەتیی خۆیان دەربڕن و داوای لێپرسینەوەی جیدی لەو پەیوەندییەدا بکەن.
هێزە ئینتزامی و چەکدارانی ئێران ساڵانە بە بیانووی هەبوونی پێشمەرگەی حیزبە کوردییەکان ئاگر لە بەشیکی زۆر لە دارستانەکانی ڕۆژهەڵاتی کوردستان بەر دەدەن.
:Contact us
