کوژران و برینداربوونی ١٢٢ کۆڵبەر لە نیوەی یەکەمی ساڵی ٢٠١٧
١٢ پووشپەڕ ٢٧١٧، ١٤:١٨
هەنگاو: لەماوەی ٦ مانگی ڕابردوودا ١٢٢ کۆڵبەر و کاسبکاری کورد کوژراون و یان بریندار بوون. بەرزبوونەوەی ڕیژەی کوژران و برینداربوونی کۆڵبەران و کاسبکارانی کورد لە حاڵێکدایە کە سالی ٢٠١٦ ی زایینی ٩٦ کۆڵبەری کورد ببوونە قوربانی.
بەپشتبەستن بە ئاماری تۆمارکراو لە ناوەندی ئاماری ڕێکخراوی مافی مرۆڤیی "هەنگاو"، لە ماوەی ٦ مانگی یەکەمی ساڵی ٢٠١٧ ی زایینیدا، ٣٩ کۆڵبەر و کاسبکاری کورد کوژراون و ٨٣ کۆڵبەر و کاسبکاری دیکەش بریندار بوون.
بە پێی ئەم ڕاپۆرتە ٣٩ کۆڵبەر و کاسبکاری کورد کوژراون کە ١٧ کۆڵبەر بە تەقەی ڕاستەوخۆی هێزە چەکدارەکانی ئێران، ٩ کۆڵبەر بەهۆی هەرەسی بەفر، ٨ کۆڵبەر بە هۆی ڕاوەدوونانی هێزە چەکدارەکانی ئێران و بەربوونەوە لە بەرزایی، ٣ کۆڵبەر بە هۆی زوقم و سەرما و ٢ کۆڵبەری بە هۆی ڕووداوی هاتووچۆوە گیانیان لە دەست داوە.
٢٥ کەس لەو کۆڵبەر و کاسباکرانە خەڵکی پارێزگای ئورمیە، ١٣ کەس خەڵکی پاریزگای سنە و کەسێکیش خەڵکی پارێزگای کرماشان بوون.
هەروەها، لەو ماوەیەدا ٨٣ کۆڵبەر و کاسبکاری کورد بریندار بوون کە ٤١ کەسیان بە هۆی تەقەی ڕاستەوخۆی هێزە چەکدارەکانی ئێران، ٢٥ کەسیان بە هۆی ڕووداوی هاتووچۆ، ٦ کەسیان بە هۆی هەرەسی بەفر، ٥ کەس بە هۆی سەرمابردوویی، ٣ کەس بە هۆی بەربوونەوە لەبەرزایی، کەسیک بەهۆی بەرد لێدانی هێزە چەکدارەکانی ئێران ، کەسیک بە هۆی کەوتنە ژێر بار و کەسێکیش بەهۆی تەقینەوەی مینەوە بریندار بوون.
لەو ژمارەیە ٤٢ کەسیان خەڵکی پارێزگای ئورمیە، ٣٢ کەسیان خەلکی پارێزگای سنە، ٧ کەسیان خەڵکی پارێزگای کرماشان و کۆڵبەریکیش خەڵکی باشووری کوردستان بووە.
زۆربەی ئەو کۆڵبەرانەی کە بوونەتە قوربانی خەڵکی شارەکانی مەریوان و سەردەشت بوون. لەو ماوەیەدا ٨ کۆڵبەری سەردەشتی کوژراون و ٢٠ کۆڵبەریش بریندار بوون.
هەروەها دوو کۆڵبەری مەریوانی کوژراون و ٢٩ کۆڵبەریش بریندار بوون کە زۆربەیان بە هۆی ڕووداوی هاتووچۆوە بووە.
بە پشتبەسین نە ئاماری تۆمارکراو لە ناوەندی ئاماری "هەنگاو"، لەماوەی سالی ٢٠١٦ی زایینیدا ٤٩ کۆڵبەر و کاسبکاری کورد کوژرابوون و ٤٧ کەسی دیکەش بریندار بوون کە سەرجەم ٩٦ کەس بوون.
