چارەنووسی ٥ گیراوی سنە پاش سێ حەفتە ناڕوونە+ وێنە
هەنگاو: پێنج هاووڵاتیی خەڵکی یەکێک لە گوندەکانی سنە کە سێ حەفتە بەر لەئێستا دەستبەسەر کران چارەنووسیان نادیارە.
بەپێی ڕاپۆرتی گەیشتوو بە ناوەندی مافی مرۆڤیی ”هەنگاو“، ٥ هاووڵاتیی خەڵکی مێراو کە ڕێکەوتی ٢٩ی گەلاوێژ لەلایەن هێزە ئەمنییەکانەوە دەستبەسەر کرابوون، چارەنووسیان نادیارە و هێشتا نازانری لە کوێ ڕاگیراون.
هاوژینی یەکێک لەو گیراوانە بە ”هەنگاو“ی ڕاگەیاند کە هەتا ئێستاش نازانرێ ئەو ٥ کەسە لە کوێ ڕاگیراون و بەدواداچوونەکانی ئێمەش هیچ ئاکامێکی نەبووە.
ناسنامەی ئەو ٥ هاووڵاتییەی کە بە تۆمەتی هەڵکردنی ئاڵای کوردستان و ئەندامەتی لەیەکێک لە حیزبەکانی ڕۆژهەڵات دەستبەسەر کرابوون بە شێوەی خوارەوەیە؛
١_ سیروان ڕوستەمی کوڕی عەلی محەممەد
٢_ وەکیڵ ڕوستەمی کوڕی محەممەد میرزا
٣_ خواڕەحم عەلی‌پوور کوڕی محەممەد
٤_ حاتم عەلی پوور کوڕی محەممەد
٥_ شوعەیب محەممەدی کوڕی جەعفەر
جێگای ئاماژەیە کە حاتەم هەمان ڕۆژ ئازاد کرابوو، بەڵام ڕۆژی دواتر دیسان دەستبەسەر کراوەتەوە.
