دەستبەسەر کرانی لانیکەم ٦ ژن لە دە ڕۆژی ڕابردوودا
هەنگاو: شەپۆلی دەستبەسەر کردنی خەڵکی کوردستان بە تاوانی دەربڕینی شادی هەر بەردەوامە و لانیکەم ٦ ژن و کچی کورد لەو ماوەیەدا دەستبەسەر کراون.
بەپشتبەستن بە ئامارەکانی ناوەندی ئاماری ڕێکخروای مافی مرۆڤیی "هەنگاو" نزیکەی ١٠ ژن بە هۆی بەشداری لە شایی و خۆشی دوای ڕیفراندۆمی سەربەخۆیی باشووری کوردستان لەلایەن هیزە ئەمنییەکانی ئێرانەوە دەستبەسەر کراون.
"هەنگاو" تا ئێستا توانیویەتی ناسنامەی 6 ژن و کجی کورد کە دەستبەسەر کراون پشتڕاست و ئاشکرا بکات.
"سارینا فەتحی، ڕووناک ئەحمەدی، لەیلا خەلیل زادە،خەڵکی شاری سەقز، "روناک ئاقایی" و کچەکەی بە ناوی "سروە موسازادە" خەڵکی مەهاباد و "موژگان" خەڵکی شاری سنە، ناسنانەی ٦ کەس لەو ژنە دەستبەسەر کراوانەن کە لەگەڵ ئاپۆرای خەڵکی کوردستان بە هۆی دەربرینی شادی بۆ سەرکەوتنی گشتپرسی هەرێمی کوردستان، هاتنە سەر شەقام و دەستبەسەر کراون.
"سروە موسازادە" کچی روناک ئاقایی، لە یەکەم شەوی دەستبەسەر کرانی ئازاد کرا و روناک ئاقایی بۆ بەندیخانەی شاری مەهاباد گوازراوەتەوە.
سەرەڕایی بەدواداچونی بنەماڵەی ئەم دەستبەسەر کراوانە، تا ئێستا هیچ زانیاریەک لەسەر بارو دۆخ و شوێنی ڕاگرتنیان لەبەردەست نیە.
