سەربازێکی کورد حوکمی ١٠ ساڵ بەندکرانی بەسەردا سەپێندرا
هەنگاو: سەربازێکی کوردی خەڵکی شنۆ بە تۆمەتی هاوکاری حیزبە کوردییەکانی دژبەری ئێران حوکمی بەندکرانی بەسەردا سەپێندرا.
بەپێی ڕاپۆرتی گەیشتوو بە ڕێکخراوی مافی مرۆڤیی ”هەنگاو“، ڕۆژی سێشەممە (٢ی خەزەڵوەر / ٢٤ی ئۆکتۆبر)، لقی یەکەمی دادگای سەربازیی ئورمیە سەربازێکی کوردی بە ناوی ”صدیق عەینی“ بە تۆمەتی هاوکاری یەکێک لە حیزبە کوردییەکانی دژی ئێران بە ١٠ ساڵ بەندکران و دوورخرانەوە بۆ بەندیخانەی ئەردەبیل مەحکووم کرد.
ئەو حوکمە بە بێ بەشداری خۆی لە ڕەوتی دادگا و تەنانەت پارێزەرە دیاریکراوەکەشی دەرکراوە.
سدیق عەینی کوڕی خەلیل، خەڵکی گوندی سینگان و دانیشتووی شاری شنۆیە.
ئەو سەربازە کوردە لە یەکێک لە ناوەندەکانی سوپای پاسداران لە شاری شنۆ سەرقاڵی تێپەڕاندنی ماوەی زۆرەملی سەربازی بووە و ٢١ی گەلاوێژی ئەمساڵ لەلایەن هێزە ئەمنییەکانی ئەو شارەوە دەستبەسەر کرا.
سدیق عەینی ئێستا لە بەندی ١٣ی بەندیخانەی ئورمیە ڕاگیراوە کە تایبەتە بە بەندکراوانی تاوانە ئاساییەکان.
