بوومەلەرزە لێدراوێکی کرماشان بە هۆی کەمتەرخەمیی بەرپرسانەوە خۆی هەڵواسی+ وێنە
هەنگاو: باروودۆخی ڕۆحی و دەروونیی خەڵکی لێقەوماوی ناوچە بوومەلەرزە لێدراوەکانی کرماشان بە هاتنی وەرزی زستان زۆر خراپتر بووە و ڕێژەی خۆکوشتنەکان لەو ناوچەیە سەلمێنەری ئەو ڕاستییەن.
بەپێی هەواڵی گەیشتوو بە ڕێکخراوی مافی مرۆڤی "هەنگاو"، ڕۆژی یەکشەممە (٣ی بەفرانبار/٢٤ی دیسامبر) هاوڵاتیەکی خەڵکی قەسری شیرین بە هۆی خراپی باروودۆخی ژیان و وڵام نەدانەوەی بەرپرسانی حکومەتی لە دوای ڕوودانی بوومەلەرزەی ئەم ناوچانە هەوڵی خۆکوشتنی داوە و لە ئاکام دا کۆتایی بە ژیانی خۆی هێناوە.
هەواڵنێری "هەنگاو" ناسنامەی ئەم هاوڵاتیە کە لە ڕێگەی خۆهەڵواسینەوە کۆتایی بە ژیانی خۆی هێناوە، ”مەیسەم کەریمی“ تەمەن ٣٣ ساڵ ڕاگەیاندووە کە باوکی منداڵێکی ٤ ساڵان بووە.
چەند ڕۆژ پێش شەهاب نادری نوێنەری هەورامان لە پەرلەمانی ئێران ڕایگەیاندبوو، لە ماوەی یەک مانگی ڕابردوو ١٥ حاڵەتی خۆکوشتن لە ناوچە بوومەلەرزە لێدراوەکان تۆمار کراوە.
