کوژرانی کاسبکارێکی مەهابادی بە تەقەی هێزە چەکدارەکانی ئێران
٦ بەفرانبار ٢٧١٧، ١٣:٠٩
هەنگاو: تەقەی ڕاستەوخۆی هێزە چەکدارەکانی ئێران لە ئۆتۆمبێلی کاسبکارێکی کورد گیان لە دەست دانی شۆڤێرەکەی لێکەوتەوە.
بەپێی ڕاپۆرتی گەیشتوو بە ڕێکخراوی مافی مرۆڤیی ”هەنگاو“، بەرەبەیانی ئەمڕۆ چوارشەممە (٦ی بەفرانبار / ٢٧ی دێسامبر)، هێزە ئینتزامییەکانی ئێران لە جاددەی پیرانشار بۆ مەهاباد و لە شوێنێک بە ناوی سەر مەیدان تەقەیان لە ئۆتۆمبێلی کاسبکارێکی کورد کردووە و بەو هۆیەوە شۆڤێری ئۆتۆمبێلەکە دەستبەجێ گیانی لە دەست داوە.
هەواڵنێری ”هەنگاو“ لە شاری مەهاباد ناسننامەی ئەو کاسبکارە کوردەی ”ڕەحمەت سلێمانزادە“ تەمەن ٣٣ ساڵ و کوڕی حوسێن ڕاگەیاندووە.
رەحمەت کە خەڵکی مەهابادە، خێزاندار و باوکی دوو منداڵی ساویە و تەرمەکەی ئێستا لە نەخۆشخانەی شاری مەهاباد ڕاگیراوە.
