پیرانشار/ سێ هاووڵاتیی دیکە دەستبەسەر کران
هەنگاو: سێ هاووڵاتیی خەڵکی پیرانشار لەلایەن هیزە ئەمنییەکانەوە لەپەیەوەندی لەگەڵ تێکەڵچوونە چەکدارییەکەی حەفتەی ڕابردووی ئەو شارە، دەستبەسە کران.
بەپێی ڕاپۆرتی گەیشتوو بە ڕێکخراوی مافی مرۆڤیی ”هەنگاو“، ڕۆژی یەکشەممە (١٧ی بەفرانبار / ٧ی ژانویە)، هێزە ئەمنییەکانی حکوومەتی ئێران لە پیرانشار دوو هاووڵاتی خەڵکی ئەو شارەیان لە کاتێکدا لە شنۆوە بەرەو پیرانشار دەهاتنەوە دەستبەسەر و بۆ شوێنێکی نادیاریان گواستوەتەوە.
هەواڵنێری “هەنگاو”، ناسننامەی ئەو دوو لاوە کوردەی “کاکە تاهیری” تەمەن ٢٢ ساڵ و “فەخرەدین تاهیری” تەمەن ٢٥ ساڵ ڕاگەیاندووە.
لەلایەکی دیکەوەو هەمان ڕۆژ، لاوێکی تەمەن ٣٠ ساڵی دیکە بە ناوی “ناسح خالیدی” کە کارمەندی نەخۆشخانەی پیرانشار بووە، دەستبەسەر و بۆ شوێنێکی نادیار گوازراوەتەوە.
ئەو سێ هاووڵاییە کوردە بە تۆمەتی هاوکاری کردنی یەکێک لە حیزبە کوردییەکانی دژبەری ئێران دەستبەسەر کراون.
رۆژی پێنجشەممە (١٤ی بەفرانبار/٤ ژانویە) هێزەکانی ئیدارەی ئیتلاعات هاووڵاتییەکی تەمەن ٥٠ ساڵیان بە ناوی “محەممەد ئیبراهیمی” هەر بەو تۆمەتە دەستبەسەر کردبوو.
هیچ زانیارییەک لە سەر چارەنووسی ئەو ٤ هاووڵاتییە کوردە و هەروەها شوێنی ڕاگیرانیان لە بەردەستدا نییە.
ئەم چوار هاووڵاتیە دوای تێکهەڵچوونەکانی ڕۆژی چوارشەممە هێزی پێشەرگەی شاری سەربە حیزبی دێموکراتی کوردستانی ئێران و هێزەکانی ئیدارەی ئیتلاعات و سپای پاسداران لە ئاوایی زێویەی سەربە شاری پیرانشار دەستبەسەر کران.
دوایی ئەم تێکهەڵچوونانە ٣ ئەندامی ئیتلاعات و ٣ ئەندامی سپای پاسداران کوژران و هەروەها ٤ ئەندامی دیکەیش بریندار کران.
