بەندکراوی سیاسی کورد سدیق عینی بۆ بەندیخانەی ئەردەبیل دوور خرایەوە
هەنگاو: سەربازێکی خەڵکی شاری شنۆ دوای ئەوەی حوکمی ١٠ ساڵ بەندکرانی بەسەردا سەپێندرا بۆ بەندیخانەی ئەردەبیل دوور خرایەوە.
بەپێی ڕاپۆرتی گەیشتوو بە ماڵپەڕی مافی مرۆڤیی ”هەنگاو“، ڕۆژی پێنج شەممە (١٩ی ڕیبەندان / ٨ی فوریە)، سدیق عەینی خەڵکی شنۆ دوای پشتڕاستبوونەوەی حوکمەکەی لەلایەن دیوانی بەرزی وڵاتەوە بۆ بەندیخانەی ناوەندیی شاری ئەردەبیل دوور خرایەوە.
سدیق عەینی ڕۆژی سێشەممە (٢ی خەزەڵوەر / ٢٤ی ئۆکتۆبر)،لەلایەن لقی یەکەمی دادگای سەربازیی ئورمیەوە بە تۆمەتی هاوکاری یەکێک لە حیزبە کوردییەکانی دژبەری ئێران بە ١٠ ساڵ بەندکران و دوورخرانەوە بۆ بەندیخانەی ئەردەبیل مەحکووم کرابوو.
ئەو حوکمە بە بێ بەشداری خۆی لە ڕەوتی دادگا و تەنانەت پارێزەرە دیاریکراوەکەشی دەرکرابوو و لە ڕۆژانی ڕابردوودا لەلایەن دیوانی بەرزی وڵاتەوە پشتڕاست کراوەتەوە.
ئەو هاووڵاتییە کە خەڵکی گوندی سینگان سەر بە شاری شنۆیە، لە رێکەوتی ٢٢ی گەلاویژی ئەمساڵ لەلایەن هێزە ئەمنییەکانی ئێرانەوە دەستبەسەر و لەماوەی ٦ مانگی ڕابردوودا لە بەندیخانەی ناوەندیی ئورمیە راگیرابوو.
ناوبراو لە کاتی دەستبەسەر کراندا لە یەکێک لە ناوەندەکانی سوپای پاسداران لە شاری شنۆ سەرقاڵی تێپەڕاندنی ماوەی زۆرەملی سەربازی بووە.
