داڵاهۆ / سێ لاوی کورد دەستبەسەر کران

هەنگاو: هێزەکانی ئیتلاعاتی سپای پاسدارانی کرماشان سێ لاوی خەڵکی یەکێک لە گوندەکانی شاری داڵاهۆیان دەستبەسەر و بۆ شوێنێکی نادیاریان گواستەوە.

بەپێی ڕاپۆرتی گەیشتوو بە ڕێکخراوی مافی مرۆڤی هەنگاو، شەوی چوارشەممە ١٥ی گەلاوێژی ٢٧٢٠ (٥ی ئاگۆستی ٢٠٢٠)، هێزەکانی ئیتلاعاتی سپای کرماشان بە ٧ ئۆتۆمبێل هەڵیانکوتاوەتە سەر گوندی “داراب” سەربە شاری ڕێژاو، ناوەندی قەزای داڵاهۆ و لانیکەم سێ لاویان دەستبەسەر کردووە.

هەواڵنێری هەنگاو لە داڵاهۆ ناسنامەی ئەو سێ لاوە کوردەی “ئارەش دارابی” تەمەن ١٨ ساڵ، “ئەفشیین سەیدمورادی” تەمەن ٢٠ ساڵ و “یەحیا سەیدمورادی” تەمەن ١٩ ساڵ ڕاگەیاندووە.

بە وتەی سەرچاوەیەکی ئاگادار، هەوڵیان داوە کە ترس و دڵەڕاوکێ لە ناو خەڵکی گوندی داراب دروست بکەن و ئەو سێ لاوەیان دەستەبسەر و سەریانیان داپۆشیوە و دواتر بەرەو شوێنێکی نادیاریان بردوون.

هەتا کاتی ئامادە کردنی ئەم هەواڵە، هۆکاری دەستبەسەر کرانی ئەو سێ لاوە کوردە بۆ هەنگاو ڕوون نەبووەتەوە.