قوربانیانی مین بە نیسبەت ساڵی ڕابردوو ٢٤٪ زیادی کردووە / ڕاپۆرتی ئاماری بە بۆنەی ٤ی ئاڤریل
ڕێکخراوی مافی مرۆڤیی ”هەنگاو“ بە بۆنەی ڕؤژی ٤بڵاو دەکاتەوە
هەنگاو: ڕێکخراوی مافی مرۆڤیی ”هەنگاو“ بە بۆنەی ڕؤژی ٤ی ئاڤریل، ڕۆژی جیهانیی وشیارکردنەوە و بەرەنگاربوونەوەی مین، ڕاپۆرتێکی ئاماری لەسەر قوربانیانی مین لە کوردستان بڵاو دەکاتەوە کە بە نیسبەت ساڵی پێشتر ٢٤٪ بەرزبوونەوەی بە خۆیەوە بینیوە.
بە پشت بەستن بە ئاماری تۆمارکراو لە ناوەندی ئاماری ”هەنگاو“، لە ماوەی (١٥ی خاکەلێوەی ٢٧١٧ هەتا ١٥ی خاکەلێوەی ٢٧١٨) واتە ( ٤ی ئاڤریلی ٢٠١٧ هەتا ٤ی ئاڤریلی ٢٠١٨)، سەرجەم ٦٤ هاووڵاتی لە سنووری ڕۆژهەڵاتی کوردستان بە هۆی تەقینەوەی مین و کەرەستەی شەڕ بوون بە قوربانی.
بە پێی ئەم ڕاپۆرتە لە کۆی ئەو ٦٤ کەسە ١٢ کەسیان گیانیان لە دەست داوە و ٥٢ کەسی دیکەش بەشێک لە جەستەیان لە دەست داوە. ساڵی ڕابردووش ١٢ هاووڵاتی گیانیان لە دەست دابوو و ٤٠ هاوولاتیش بریندار ببوون کە ئەمساڵ ڕێژەی بریندارەکان بە نیسبەت ساڵی ڕابردوو ٣٠٪ زیادی کردووە.
هەروها ٨ کەس لەو کەسانەی بوون بە قوربانی لەو شوێنانەی بووە کە حکومەتی ئێران پێشتر جێژنی خاوێنکردنی ئەو کێڵگانەی لە مین ڕاگەیاندووە و ناوی تەواوی ٥٧ کەس لەو قوربانیانە لە ”هەنگاو“ تۆمار کراوە.
قوربانیان بە پێی پارێزگاکان
بە پشتبەستن بە ئاماری تۆمارکراو لە ناوەندی ئاماری ”هەنگاو“، لە ماوەی ساڵی ڕابردوودا ١٨ هاووڵاتی لە پارێزگای ئیلام، ١٨ هاووڵاتی لە پارێزگای سنە، ١٥ هاووڵاتی لەپارێزگای ئورمیە، ١٢ هاووڵاتی لە پارێزگای کرماشان و ٣ هاووڵاتیش لە پارێزگای لوڕستان بە هۆی تەقینەوەی مین و کەرەستەی سەربازییەوە بوون بە قوربانی.
زیاترین کوژرا لە پارێزگای ئیلام بووە کە ٦ حاڵەتی تێدا تۆمار کراوە، هەروەها لەپارێزگای کرماشان ٣ حاڵەت، سنە ٢ حاڵەت و ئومریەش یەک حاڵەتی کوژران تۆمار کراوە.
٢٠ هاووڵاتیی مەدەنی لە نێو قوربانییەکاندان
لە کۆی ئەو ٦٤ کەسەی کە بوون بە قوربانی، ٢٥ کەسیان کۆڵبەر، کرێکار و شۆڤێر بوون، ٢٠ کەس هاووڵاتیی مەدەنی و هەروەها ١٩ کەسیشیان مین هەڵگر و چەکداری ئێران بوون.
ڕەگەزی قوربانییەکان
لەماوەی ئاڤریلی ٢٠١٧ هەتا ئاڤریلی ٢٠١٨ سەرجەم ٥٧ پیاو و ٧ ژن بە هۆی تەقینەوەی مینەوە لە ڕۆژهەڵاتی کوردستان بوون بە قوربانی .
هەروەها ٣ منداڵ و ٧ لاویش لە نێو قوربانیاندا دەبیندرێن.
ئاماری مین لە کوردستان
دوای سێ دەیە لە کۆتایی هاتنی شەڕی عێران و عێراق، مین هێشتا لە کوردستان قوربانی دەگرێت و به‌پێی ئاماری ناوه‌ندی نه‌هێشتنی مین لە ئێران، چوار ملیۆن و دووسه‌د هه‌زار هیکتار له پانتایی پێنج پارێزگای سنووری پارێزگاکانی ئورمیە، سنە، کرماشان، ئیلام و خووزستان له درێژایی ساڵه‌کانی شه‌ری ئێران و ئێراق مین رێژ کرابوون که زۆرترین کێڵگه‌کانی مین له ناوچه کورد نشینه‌کان واته رۆژهه‌ڵاتی کوردستانه.
به‌پێی ئه‌و زانیاریانه‌ی که له ده‌قی رێکه‌وتن نامه‌ی نێوان ئێران و ءێراق که له سالی ١٣٨٤ی هەتاویدا نووسراوه زیاتر له ٢٠ ملیۆن مین له سه‌ر سنووری ئێراندا هه‌یه، پتر له ٧٠%ی ناوچه مینڕێژ كراوه‌كان ـ به پێی ئاماره فه‌رمییه‌كانی خودی حکومەت ـ لە چوار پارێزگای کوردستان هەڵکەوتووە.
وڵاتی ئێران هەتا ئێستاش نەک هەر ئامادە نەبووە کە کۆنوانسیۆنی “ئۆتاڤا” لەپەیوەندی لەگەڵ قەدەغەکردنی بەکارهێنان، بەرهەم هێنان و راگرتنی مینی دژە نەفەر واژۆ بکات، بەڵکوو لەماوەی دوو ساڵی ڕابردوودا هێندیک ناوچەی نوێی بە بیانووی پێشگرتن لە هاتووچۆی هێزی پێشمەرگەی کوردستان مین ڕێژ کردووە.
بەکارهێنانی ئەم ڕاپۆرتە بە مەرجی ئاماژە بە سەرچاوە (هەنگاو) ڕێگەپێدراوە
