ڕاپۆرتێک لە سەر دەستبەسەرکرانی پێنج ئەندامی پێشووی کۆمەڵە لە سنووری بانە

هەنگاو: چوارشەممە ٢٨ی بانەمەڕی ٢٧٢٢

پێنج ئەندامی پێشووی کۆمەڵە بە ناوەکانی نەوزاد کەریمی خەڵکی مەریوان، وریا موئەید خەڵکی سنە، عەلی سەحرایی خەڵکی کرماشان، کەژان سەمەدی ٤٠ ساڵە و کچەکەی بە ناوی شیلان ئومێد پەنا ١٨ ساڵە خەڵکی مەریوان لەلایەن هێزەکانی ئیتلاعاتی سوپا لە سنووری بانە دەستبەسەر کراون.

هەنگاو زانیویەتی کە ئەم کەسانە کە ئەندامی پێشووی کۆمەڵە و دانیشتووی هەرێمی کوردستان بوون، کۆتایی مانگی خاکەلێوەی ئەمساڵ بە مەبەستی ڕۆیشتن بۆ تورکیا (لەوێشەوە بۆ ئەورووپا) و لە لایەن چەند قاچاخچییەکی مرۆڤەوە براونەتە سنووری بانە هەتا لە سنووری ئورمیەوە خۆیان بگەیەننە وڵاتی تورکیا. لە ڕێگادا کەوتوونەتە بۆسەی هێزەکانی ئیتلاعاتی سوپا و دەستبەسەر کراون.

بە وتەی سەرچاوەیەکی ئاگادار، ئەم پێنج کەسە دوای دەستبەسەرکران بۆ دەستبەسەرگەیەکی ئەمنی لە شاری سنە گوازراونەتەوە و چارەنووسیان نادیارە.

جێگای باسە کە سوپای پارێزگای سنە ڕۆژی سێشەممە ٢٠ی بانەمەڕ ڕاگەیەندراوێکی بڵاو کردەوە و ڕایگەیاندبوو کە پێنج ئەندامی «گرووپێکی تیرۆریستی» لە سنووری بانە دەستبەسەر کراون و بانگەشەی ئەوەشی کردبوو کە دەستی بە سەر ژمارەیەکی زۆر چەک و تەقەمەنیدا گرتووە. بەو حاڵەشەوە وێنە و زانیاری زیاتری لە سەر ئەو کەسانە و هەروەها ئەو چەک و تەقەمەنییانەی کە باسی کردبوو بڵاو نەکردبووەوە.
بەگوێرەی زانیارییەکانی هەنگاو، ئەم کەسانە سێ حەفتە بەر لەو ڕاگەیەندراوەی سوپای پاسداران دەستبەسەر کراون و بە هیچ جۆرێک چەکدار نەبوون.

ڕێکخراوی مافی مرۆڤی وێڕای دەربڕینی نیگەرانی خۆی بە نیسبەت چارەنووسی ئەم پێنج کەسە جەخت دەکاتەوە کە ئەوان چەکدار نەبوون و لە کاتی دەستبەسەرکرانیاندا هیچ جۆرە تێکهەڵچوونێک نەهاتووەتە ئاراوە.