عەلی دڵباختە پزیشکی ناسراوی خەڵکی سەرپێڵی زەهاو دەستبەسەر کرا

هەنگاو: دووشەممە ٢ی جۆزەردانی ٢٧٢٢

لە ماوەی ڕۆژانی ڕابردوودا لانی کەم سێ هاووڵاتیی خەڵکی سەرپێڵی زەهاو سەر بە پارێزگای کرماشان یەک لەوان دکتۆر عەلی دڵباختە بە هۆی ناڕەزایەتی دەربڕین بە گرانی و بەرزبوونەوەی نرخی پێداویستییە سەرەتاییەکان لەلایەن هێزە ئەمنییەکانی کۆماری ئیسلامیی ئێرانەوە دەستبەسەر کراون.

هەتا کاتی ئامادە کردنی ئەم هەواڵە ناسنامەی دوو کەس لە دەستبەسەرکراوەکانی بە ناوەکانی عەلی دڵباختە و یەزدان جوانمێری بۆ هەنگاو ئاشکرا بووە و ناسنامەی کەسی سێیەم ئاشکرا نەبووە.

هەنگاو زانیویەتی کە ئەم کەسانە دوای ناڕەزایەتی دەربڕین بە گرانی و بەرزبوونەوەی نرخی پێداویستییە سەرەتاییەکانی ڕۆژانە دەستبەسەر کراون و زانیارییەکی ورد لە سەر چارەنووس و شوێنی ڕاگیرانی دوو کەسیان لە بەر دەستدا نییە.

جێگای ئاماژەیە کە د. عەلی دڵباختە یەکێک لە پزیشکە لە خۆبردوو و خۆشناوەکانی ناوچەیە کە ئێستا لە ناوچەی ئیزگڵە سەرقاڵی خزمەت کردنە و دوای ناڕەزایەتی و گوشاری خەڵک ئازاد کراوە.

چالاکانی مەدەنی سەرپێڵی زەهاو ڕایانگەیاندووە کە بڕیاری دەستبەسەرکردنی زیاتر لە ١٠ کەسی دیکە لەلایەن ناوەندە ئەمنیی و دادوەرییەکانەوە دەرکراوە.