موحسین شکووهی مامۆستای خانەنشینکراوی سەقزی دەستبەسەر کرا

هەنگاو: شەممە ٢٨ی جۆزەردانی ٢٧٢٢

هێزەکانی ئیدارەی ئیتلاعاتی سەقز کاتژمێر ٣٠ خولەکی بەرەبەیانی ڕۆژی هەینی ٢٧ی جۆزەردانی ٢٧٢٢ هەڵیانکوتاوەتە سەر ماڵی موحسین شکووهی تەمەن ٥١ ساڵ و مامۆستای خانەنشینکراو و دەستبەسەریان کردووە.

یەکێک لە نزیکانی بنەماڵەی شکووهی لەوبارەوە بە هەنگاوی وت: هێزەکانی ئیدارەی ئیتلاعات کاتژمێر ٣٠ خولەکی بەرەبەیان بە ئۆتۆمبێلێکی جۆری پژۆ ٤٥ هەڵیانکوتاوەتە سەر ماڵی شکووهی و ناوبراویان دەستبەسەر کردووە.

هەنگاو زانیویەتی کە هێزەکانی ئیدارەی ئیتلاعاتی دەستیان بە سەر مۆبایلی موحسین شکووهی گرتووە و لەو کاتەوە چارەنووسی نادیارە.

بە هەژمارکردنی ئەم حاڵەتە ژمارەی ئەو مامۆستایانەی کە لە ماوەی سێ ڕۆژی ڕابردوودا لە شاری سەقز دەستبەسەر کراون بۆ ٢١ کەس بەرز بووەوە.