سێ هاووڵاتیی دەستبەسەرکراوی خەڵکی شنۆ بە بارمتە ئازاد کران
سێ هاووڵاتیی دەستبەسەرکراوی مانگی گەلاوێژی شاری شنۆ بە ناوەکانی حەکیم میرزایی، هیوا میرزایی و زاهیر مورادی دوای یەک مانگ دەستبەسەرکران
هەنگاو: هەینی ١٨ی خەرمانانی ٢٧٢٢
سێ هاووڵاتیی دەستبەسەرکراوی مانگی گەلاوێژی شاری شنۆ بە ناوەکانی حەکیم میرزایی، هیوا میرزایی و زاهیر مورادی دوای یەک مانگ دەستبەسەرکران هەر کامەیان بە دانانی بارمتەی ٢٠٠ ملیۆن تمەنی و بە شێوەی کاتی لە بەندیخانەی ناوەندیی شنۆ ئازاد کران.
هەنگاو زانیویەتی کە ئەم سێ هاووڵاتییە کوردە لە ماوەی ئەو ڕۆژانەی کە دەستبەسەر بوون لە مافی هەبوونی پارێزەر بێبەش کراون و لەلایەن دەزگا ئەمنییەکانی کۆماری ئیسلامیی ئێرانەوە بە هاوکاری کردنی حیزبێکی کوردستانی دژبەری حکومەت تۆمەتبار کراون.
حەکیم میرزایی ٢٨ ساڵە، هیوا میرزایی ٢٣ ساڵە (برای حەکیم)، زاهیر مورادی ٢٣ ساڵە و ئارەش پیری ٢٢ ساڵە سەرجەمیان خەڵکی گوندی بێمزورتێ شنۆ، ڕۆژی یەکشەممە ٢٣ی گەلاوێژی ٢٧٢٢ (١٣ی ئاگۆستی ٢٠٢٢) بەبێ پیشاندانی بەڵگەی دادوەری لەلایەن هێزەکانی ئیدارەی ئیتلاعاتی شنۆ دەستبەسەر و بۆ دەستبەسەرگەی ئەو ناوەندە ئەمنییە لە ئورمیە گوازرانەوە.
حەکیم میرزایی، هیوا میرزایی و زاهیر مورادی ڕۆژی سێشەممە ٨ی خەرمانانی ٢٧٢٢ (٣٠ی ئاگۆست) لە دەستبەسەرگەی ئیتلاعاتی ئورمیەوە بۆ بەندیخانەی ناوەندیی شنۆ گوازرانەوە.
