دەستبەسەرکران و ناڕوونی چارەنووسی هاووڵاتییەکی کورد لە تاران

هەنگاو: پێنجشەممە ١٤ی ڕەزبەری ٢٧٢٢
دوای تێپەڕینی نزیکەی سێ هەفتە لە دەستبەسەرکرانی فەرزاد وەرمەقانی هاووڵاتیی کوردی خەڵکی شاری سونقوڕ و کولیایی و دانیشتووی شاری ڕەی تاران، چارەنووس و شوێنی ڕاگیرانی نادیارە.

بەگوێرەی ڕاپۆرتی گەیشتوو بە ڕێکخراوی مافی مرۆڤی هەنگاو، فەرزاد وەرمەقانی تەمەن ٢٧ ساڵ، خێزاندار و باوکی منداڵێکە و ڕۆژی سێشەممە ٢٩ی خەرمانانی ٢٧٢٢ (٢٠ی سێپتەمبەری ٢٠٢٢) لە شوێنی کارەکەی (میکانیکی) لەلایەن هێزەکانی ئیدارەی ئیتلاعاتی ڕەی دەستبەسەر کراوە.

سەرچاوەیەکی نزیک لە بنەماڵەی وەرمەقانی لەوبارەوە بە هەنگاوی وت: «لە ماوەی سێ هەفتەی ڕابردوودا بنەماڵەکەمان چەندین جار سەردانی ناوەندە ئەمنییەکانیان کردووە بەڵام هیچ وەڵامێکیان پێمان نەداوەتەوە و هەر ئەمەش نیگەرانمانی کردووە».

ئەو سەرچاوەیە لە درێژەدا وتی کە فەرزاد وەرمەقانی بۆ هۆی پشتیوانی لە ناڕەزایەتییەکان و بڵاوکردنەوەی پۆستی پەیوەندیدار لە تۆڕە کۆمەڵایەتییەکان دەستبەسەر کراوە.