دەستبەسەرکران و ناڕوونی چارەنووسی چالاکێکی مەدەنی ناسراوی کورد لە ئابادان

هەنگاو: چوارشەممە، ٢٠ی ڕەزبەری ٢٧٢٢


سەعدان ئەحمەدنەژاد، ٤٦ ساڵ و چالاکی مەدەنی ناسراوی کورد و دانیشتووی شاری ئابادان، ڕۆژی یەکشەممە، ڕێکەوتی ١٧ی ڕەزبەری ٢٧٢٢ (٩ی ئۆکتۆبەری ٢٠٢٢) لەلایەن هێزە ئەمنییەکانی ئیدارەی ئیتلاعاتی ئابادان دەستبەسەرکراوە و چارەنووسی نادیارە.

بەگوێرەی ڕاپۆرتی گەیشتوو بە ڕێکخراوی مافی مرۆڤی هەنگاو، هێزەکانی ئیدارەی ئیتڵاعات، سەعدان ئەحمەدنەژادیان لە پێش قوتابخانەی کچەکەی دەستبەسەرکردووە.

یەکێک لە نزیکانی بنەماڵەی ئەحمەدنەژاد لەمبارەوە بە هەنگاوی ڕاگەیاند: "دوای سێ کاتژمێر لە دەستبەسەرکرانی سەعدان، هێزە ئەمنییەکان هێرشیان کردووەتە سەر ماڵەکەی ودەستیان بە پشکنین کردووە و کۆمپیوتەری ناوبراویان بردووە.

پاشان هەر ئەو هێزانە چوونەتە سەر دووکانی ئەو چالاکوانە کە ناوی (نوێنەرایەتی هەنگوینی مەلەکەی کوردستان)، ئەوێشیان پشکنیوە".

لە کاتی ڕووخانی بینایی "مێترۆ پۆل"ی ئابادان و گیان لەدەستدانی ژمارەیەک لە هاووڵاتیان، سەعدان ئەحمەدنژاد پەیامێکی بە نوێنەرایەتی کوردانی دانیشتووی ئابادان خوێندبووەوە.


شیاوی ئاماژە پێدانە کە سەعدان ئەحمەدنەژاد خەڵکی گوندی تەنگی سەر سەر بە شاری سنەیە و دانیشتووی شارای ئابادانە.