ناڕوونیی چارەنووسی دوو هاووڵاتیی ڕفێندراوی خەڵکی شاری بۆکان

هەنگاو: دووشەممە، ۵ی بەفرانباری ٢٧٢٢

دوو هاووڵاتیی خەڵکی شاری بۆکان بە ناوەکانی هەورام مێهرنەوایی و موحسین ڕەسووڵزادە کە خزمی یەکترن، لە ناوەڕاستی مانگی سەرماوەزدا لەلایەن هێزە حکومەتییەکانەوە ڕفێندراون و بۆ شوێنی نادیار گواستراونەتەوە و تاکوو ئێستا چاڕەنووسیان ناڕوونە.

بەپێی ڕاپۆرتی گەیشتوو بە ڕێکخراوی مافی مرۆڤی هەنگاو؛ بەردەوامیی هەوڵەکانی بنەماڵەی ئەو دوو هاووڵاتییە بۆ بەدواداچوون لەسەر چارەنووس و شوێنی ڕاگیرانی هەورام مێهرنەوایی، تەمەن ٢٠ ساڵ و موحسین ڕەسووڵزادە، تەمەن ٣٧ ساڵ و خەڵکی شاری بۆکان کە لەلایەن هێزە حکومەتییەکانی کۆماری ئیسلامی لەو شارە ڕفێندراون، تاکوو ئێستا بێ ئاکام ماوەتەوە و هیچ زانیارییەکیان دەست نەکەوتووە، هەروەها ناوەندە حکومەتییەکان لە وەڵامدانەوەی بنەماڵەی ئەو دوو هاووڵاتییە خۆیان دەبوێرن.

بەگوێرەی زانیارییەکی هەنگاو، موحسین ڕەسووڵزادە، شووی پووری هەورام مێهرنەوایییە و ئەو دوو کەسە پێکەوە ڕفێندراون.

شایانی باسە کە ئەو دوو هاووڵاتییە ڕۆژی هەینی، ١١ی سەرماوەزی ٢٧٢٢ (٢ی دیسەمبەری ٢٠٢٢) لە شاری بۆکان و لەلایەن هێزە جێگیرکراوەکانی کۆماری ئیسلامیی ئێران لەو شارە ڕفێندراون و تا هەنووکە هیچ زانیارییەک لەسەر چارەنووس، بارودۆخ، باری تەندروستی و شوێنی ڕاگیرانیان لە بەردەستدا نییە.

هەورام مێهرنەوایی و موحسێن ڕەسووڵزادە، لە ماوەی دەستبەسەربوونیاندا لە سەرەتاییترین مافەکانیان وەک چاوپێکەون و پەیوەندی تەلەفۆنی لەگەڵ بنەماڵەکانیان و دەستپێڕاگەیشتن بە پارێزەر بێبەری و بێبەش کراون.