میلیتاریزەکردنی کوردستان درێژەی هەیە؛ فڕینی هەلیکۆپتەر بەسەر شارەکاندا و ڕوودانی پێکدادانێکی چەکدارانە لە ئورمیە

هەنگاو؛ پێنجشەممە ٢٥ی جۆزەردانی ٢٧٢٣

جووڵەکانی سوپای پاسداران لە کوردستان درێژەی هەیە. هەلیکۆپتەرە نیزامییەکان لە مەودایەکی نزمەوە بەسەر شارەکاندا دەسووڕێنەوە و لانی کەم پێکدادانێکی چەکدارانە ڕوویداوە.

بەپێی ڕاپۆرتی گەیشتوو بە ڕێکخراوی مافی مرۆڤی هەنگاو، سەرلەبەیانی ڕۆژی پێنجشەممە ٢٥ی جۆزەردانی ٢٧٢٣ (١٥ی ژوئەنی ٢٠٢٣)، هەلیکۆپتەرە سەربازییەکانی سوپای پاسداران بەسەر شارەکانی سنە، مەهاباد و سەوڵاوادا سوڕاونەتەوە.

هەروەها شەوی ڕابردوو لە دەوروبەری پایگایەکی سوپای پاسداران لە نزیک شارەکی ئەلواج، سەر بە شاری ئورمیە شەڕ و تێکهەڵچوون لە نێوان سوپا و هێزێکی نەناسراو ڕوویداوە، کە هەنگاو لە هەوڵی دەستخستنی وردەکاری زیاترە.

لەچەند حەوتووی ڕابردوودا، سوپای پاسداران لە هەوڵێکی تۆکمەدا دەستی بە گواستنەوەی چەک و چۆڵی قورس و زرێپۆش بۆ کوردستان کردووە، هەروەها هەموو ئەم ناوچانەی میلیتاریزە کردووە و چەندین پایەگای نوێی لە ناوچە سنوورییەکان دروستکردووە.

هەر لەم ڕاستایەدا و بەپێی بەڵگەکانی هەنگاو، تۆپخانەکانی سوپای پاسداران لانی کەم شەش جار بەرزاییەکانی شاهۆ و کۆساڵان لە پاوە و سەوڵاوە و بۆرالانی لە ماکۆ تۆپباران کردوە. لە تێکهەڵچوونی نێوان ئەم هێزانە و هێزەکانی پژاکیشدا ئەندامێکی سوپای پاسداران کوژراوە.

هەنگاو جارێکی دیکە جەخت دەکاتەوە کە ناوچەی کۆساڵان وشاهۆ بەپێی یاساکانی کۆماری ئیسلامی سەر بە ناوچە ژینگەیییە پارێزراوەکانن و ئەنجامدانی هەرجۆرە چالاکییەکی سەربازی و چەکداری لەم ناوچانە و گۆڕینی ئەم ناوچانە لە شوێنی گیانلەبەرە دەگمەن و جڕوجانەوەر و گیاکان بۆ شوێنێکی چەکدارانە وەک ئێکۆترۆریسم لەلایەن سوپای پاسدارانەوە بە هەژماردێت.