هێڵی تەلەفۆنی بەندی ژنانی بەندیخانەی سنە بەتەواوی پچڕاوە
هەنگاو زانیویەتی کە خزمەتگوزاری پەیوەندی تەلەفۆنی ناوەندی چاکسازی و پەرەوەردەی سنە ناسراو بە بەندی ژنان، لەلایەن بەرپرسانی بەندیخان
هەنگاو: شەممە ١٠ی پووشپەڕی ٢٧٢٣
هەنگاو زانیویەتی کە خزمەتگوزاری پەیوەندی تەلەفۆنی ناوەندی چاکسازی و پەرەوەردەی سنە ناسراو بە بەندی ژنان، لەلایەن بەرپرسانی بەندیخانەوە بە چەند هۆکارێکی نادیار پچڕێندراوە و ئەمەش نیگەرانی بنەماڵەی بەندکراوانی لێکەوتووەتەوە.
بەپێی ڕاپۆرتی گەیشتوو بە ڕێکخراوی مافی مرۆڤی هەنگاو، لە یەک حەوتوو پێشەوە هێڵی تەلەفۆنی بەندی ژنانیبەندیخانەی شاری سنە بەتەواوەتی پچڕاوە و بەندکراوان لەم ماوەیەدا هیچ پەیوەندییەکیان بە بنەماڵەکانیانەوە نەگرتووە.
بەوتەی سەرچاوەکانی هەنگاو، بەدواداچوونەکانی بەندکراوانی ناوەندی چاکسازی و پەروەردەی سنە و بنەماڵەکانیان لەم ڕاستایەدا بێ ئاکام ماوەتەوە و هیچ لایەنێکی پەیوەندیدار وەڵامی داواکارییەکانیان نەداوەتەوە.
هۆکاری پچڕانی هێڵی تەلەفۆنی بەندی ژنانی بەندیخانەی سنە، کە پێشتریش بەشێوەیەکی بەردەوام دووبارە کراوەتەوە، لەلایەن بەرپرسانی بەندیخانەوە بە هەبوونی کێشە لە هێڵەکان و خراپبوونی کابلەکانی تەلەفۆن ڕاگەیندراوە. بەڵام بنەماڵەی بەندکراوانی ئەم بەندیخانەیە پێیان وایە ئەم کارە بە ئەنقەست و لە ڕاستای گوشاری زیاتر خستنە سەر بەندکراوان ئەنجامدراوە.
