دەستبەسەرکردن و بریندارکردنی کۆمەڵێک هاووڵاتیی خەڵکی ئیلام بەهۆی هێرشی هێزە حکوومەتییەکان

هەنگاو: سێشەممە، ٣ی گەلاوێژی ٢٧٢٣

هێزە چەکدارە حکوومەتییەکان و شارەوانیی شاری ئیلام هێرشیان کردووەتە سەر ماڵی دانیشتووانی باکووری ئەو شارە و دەستیان کردووە بە ڕووخاندنی ماڵەکانی هاووڵاتییان، ئەم کردەوە دڕندانەیەش بەرەنگاریی خەڵک و تەقەکردنی هێزە حکوومەتییەکان لێ کەوتووەتەوە و بەم هۆیەوە ٤ هاووڵاتی بریندار و ٦ هاووڵاتیش دەستبەسەرکراون.

بەپێی ڕاپۆرتی گەیشتوو بە ڕێکخراوی مافی مرۆڤی هەنگاو؛ ئێوارەی ڕۆژی دووشەممە، ٢ی پووشپەڕی ٢٧٢٣ (٢٤ی جولایی ٢٠٢٣)، هێزە حکوومەتییەکان و شارەوانیی ئیلام ماڵی ٣ هاووڵاتیی دانیشتووی ئەو شارە لە کۆتاییی شەقامی "هەفت تیر" کە دەکەوێتە باکووری شاری ئیلام، ڕووخاندووە و ئەم کردەوە دڕندانەیەش بەرەنگاربوونەوەی خەڵکی لێ کەوتووەتەوە.

لە درێژەی ئەم تێکهەڵچوونەی نێوان هێزە چەکدارە حکوومەتییەکان و خەڵکی ئەو شارە، لانی کەم ٤ هاووڵاتی بە ناوەکانی فەریدە حاجییان، عەباس پوورداوود، پوویا پوورداوود و شەمسەدین قەیسەری بە تەقەی ڕاستەوخۆی هێزە چەکدارە حکوومەتییەکان بریندار بوون.

هەروەها لانی کەم شەش هاووڵاتیی دیکە بە ناوەکانی ئیلاهە وەلیزادە، موراد ئەنساری، مورتەزا هەواسی، شایان عەزیزنژاد، یاسر قاسمی و ڕۆحوڵڵا زارعی دەستبەسەر کراون.

بەپێی ئەو گرتە ڤیدیۆیییانەی بە ڕێکخراوی مافی مرۆڤی هەنگاو گەیشتوون، هێزە چەکدارە حکوومەتییەکان بۆ بڵاوەپێکردنی ئەو خەڵکەی کە لەو شوێنە کۆ بوونەتەوە، گازی فرمێسکڕێژیان بەکار هێناوە.