دەستبەسەرکرانی دوو هاووڵاتیی کورد لە میاندواو

هەنگاو: سێشەممە ٢٤ی گەلاوێژی ٢٧٢٣

لە هێرشێکدا هێزەکانی حکوومەت لە شاری میاندواو دوو هاووڵاتیی کوردی خەڵکی ئەم شارەیان بەناوەکانی مامڵ شەریفی و ئەرسەلان خەیری دەستبەسەرکرد و بۆ شوێنێکی نادیاریان گواستنەوە.

بەپێی ڕاپۆرتی گەیشتوو بە ڕێکخراوی مافی مرۆڤی هەنگاو، ڕۆژی سێشەممە، ٢٤ی گەلاوێژی ٢٧٢٣ (١٥ی ئاگۆستی ٢٠٢٣)، مامڵ شەریفی و ئەرسەلان خەیری لەلایەن هێزەکانی ئیتلاعاتەوە دەستبەسەرکران. ئەم دوو هاووڵاتییە هەردووکیان خێزاندار و خەڵکی گوندی "بەفرەوان"ی سەر بە شاری میاندواو بوون.

بەوتەی سەرچاوەیەکی ئاگادار، هێزەکانی حکوومەت بەبێ هەبوونی بەڵگەی یاسایی و ئیزنی دادوەر هێرشیان کردووەتە سەر ماڵی ئەم دوو هاووڵاتییە و دەستبەسەریان کردوون.

هەتا ئێستا، شوێن، بارودۆخی ڕاگیران و ئەو تۆمەتانەی کە دراونەتە پاڵ ئەم دوو هاووڵاتییە بەنەزانراوی ماونەتەوە.