درێژەی دەستبەسەربوونی ماشەڵڵا کەرەمی لە ژووری تاکەکەسیی دەستبەسەرگەی ئیتلاعاتی سوپای پاسداران

هەنگاو: شەممە، ٢٢ی ڕەزبەری ٢٧٢٣

ماشەڵڵا کەرەمی، باوکی محەممەدمەهدی (کۆمار) کەرەمی، گیانبەختکردوویەکی بزووتنەوەی ژن، ژیان، ئازادی، ماوەی ٤٥ ڕۆژە لە دەستبەسەرگەی ئیتلاعاتی سوپای پاسداران ڕاگیراوە و لەو ماوەیەشدا هەر لە ژووری تاکەکەسیدا بووە.

بەپێی ڕاپۆرتی گەیشتوو بە ڕێکخراوی مافی مرۆڤی هەنگاو؛ ماشەڵڵا کەرەمی، ئەندامی بنەماڵەیەکی دادخوازی کوردستان، ماوەی مانگێک و ١٤ ڕۆژە لە دەستبەسەرگەی ئیتلاعاتی سوپای پاسدارانی کەرەج ڕاگیراوە و لەو ماوەیەدا جیا لەوەی کە هەر لە ژووری تاکەکەسیدا بووە، لە مافی چاوپێکەوتن لەگەڵ بنەماڵە و کەسوکارەکەشی بێبەری و بێبەش کراوە.

هەنگاو پێشتر ڕایگەیاندووە؛ سیروان کەرەمی، کوڕی ماشەڵڵا و هاوژینەکەی سیروان لەژێر گوشاری چڕوپڕی ئیتلاعاتی سوپای پاسداراندا بوون و هەڕەشەیان لێ کراوە کە نابێت هیچ جۆرە زانیارییەک لەسەر ڕەوتی ئەو دۆسیەیە و بارودۆخی دەستبەسەربوونی ماشەڵڵا کەرەمی بڵاو بکەنەوە.

هەروەها ئەمیرحوسێن کووهکەن، پارێزەری بنەماڵەی کەرەمی کە ئەویش پاش ئەوەی ڕۆژی ٨ی خەرمانان بانگ کراوە، دەستبەسەر کراوە و تاکوو ئێستاش لە دەستبەسەرگەی ئیدارەی ئیتلاعاتی کەرەج لە ژووری تاکەکەسیدا ڕاگیراوە.

سینا یووسفی، پارێزەر، لەم ماوەیەدا لەسەر بارودۆخی دەستبەسەربوونی ئەمیرحوسێن کووهکەن نووسیبووی: "دۆخی جەستەیی و دەروونیی ئەم پارێزەرە زۆر نالەبار و ناجێگیرە، تەنانەت بەهۆی گوشارەکانی وەزارەت ئیتلاعاتەوە بڕیاری خۆکوشتنی داوە".

بەگوێرەی زانیاریی سەرچاوە ئاگادارەکان، ناوەندە ئەمنییەکانی ئێران خەریکن دۆسیەیەک بۆ ماشەڵڵا کەرەمی و ئەمیرحوسێن کووهکەن دروست دەکەن و بە مەبەستی وەرگرتنی دانپێدانانی زۆرەملێ لەو دوو هاووڵاتییە، لەلایەن ئەو ناوەندە حکوومەتییانەوە بە چڕوپڕی لەژێر گوشاردان.

محەممەدمەهدی (کۆمار) کەرمی، لاوێکی کوردی خەڵکی شاری بیجاڕ و تەمەن ٢١ ساڵ، لەگەڵ محەممەد حوسێنی، تۆمەتبارێکی سەرەکیی دیکەی ئەو دۆسیەی بەناو "کوشتن"ی ڕوحوڵڵا عەجەمیان، ئەندامی بەسیج، سزای سێدارەیان بەسەر سەپا و دوای ئەوەی کە بە شێوەیەکی دڕندانە ئەشکەنجە کراون، دواجار بەرەبەیانیی ڕۆژی ١٧ی بەفرانباری ٢٧٢٢، لەسێدارە دران.