بۆکان؛ ڕاپۆرتێک لەسەر دەستبەسەرکران و ئازادبوونی شەش هاووڵاتی لەلایەن ناوەندە ئەمنییەکانەوە

هەنگاو؛ چوارشەممە ٦ی بەفرانباری ٢٧٢٣

شەش هاووڵاتیی خەڵکی بۆکان لەلایەن ئیدارەی ئیتلاعات لەو شارە دەستبەسەرکران و لێپرسینەوەیان لێکراوە. ناسنامەی ئەو هاووڵاتییانە مەهدی ڕەحیمی ئازەر، سەلاح ڕەحیمی ئازەر، ڕزگار ڕەحیمی ئازەر، ئەنوەر قاسمپوور، کەماڵ خزری و کەماڵ ناسری بۆ هەنگاو ئاشکراکراوە.

بەپێی ڕاپۆرتی گەیشتوو بە ڕێکخراوی مافی مرۆڤی هەنگاو، ڕۆژی دووشەممە ٤ی بەفرانباری ٢٧٢٣ (٢٥ی دیسەمبەری ٢٠٢٣)، شەش هاووڵاتیی خەڵکی گوندی "کانی ڕەش"ی بۆکان لەلایەن هێزەکانی ئیدارەی ئیتلاعاتەوە لەو شارە دەستبەسەرکراون.

لە نێو ئەو دەستبەسەرکراوانە، کەماڵ خزری و کەماڵ ناسری دوای چەند کاتژمێر و ئەو چوار هاووڵاتییەی دیکە ڕۆژی چوارشەممە ٦ی بەفرانبار لە دەستبەسەرگەی ئیتلاعاتی بۆکان ئازادکراون.

هەتا کاتی داڕشتنی ئەم هەواڵە، لە هۆکارەکانی دەستبەسەرکران و هەروەها ئەو تۆمەتانەی دراونەتە پاڵ ئەو هاووڵاتییانە زانیارییەکی ورد لەبەر دەستدا نییە.