دانیشتنی دادگای دوو پێشمەرگەی بەدیل گیراوی پاک بۆ حەفتەی داهاتوو دواخرا

هەنگاو: ڕۆژی ڕابردوو هۆشمەند عەلپووڕ خەڵکی سەردەشت و محەمەد ئوستادقادر خەڵی سەقز بە مەبەستی تەواوکردنی دۆسیەکەیان لە دادگا حازر بوون، بەڵام دانیشتنی دادگاکەیان بۆ حەفتەی داهاتوو دواخرا.

بەپێی ڕاپۆرتی ڕێکخراوی مافی مرۆڤی هەنگاو، ڕۆژی سێشەممە (٤ی بەفرانباری ٢٧١٨ / ٢٥ی دێسامبری ٢٠١٨)، هۆشمەند و محەمەد هاوڕێ لەگەڵ پارێزەرەکەیان لە دادگای شۆڕشی شاری سنە حازر بوون، بەڵام دانیشتنی دادگا بەڕێوە نەچوو و هیچ حوکمێک دەر نەکرا و دانیشتنی دادگا بۆ دووشەممەی حەفتەی داهاتوو دواخراوە.

کەمپەینی ڕزگارکردنی هۆشمەند عەلیپوور بە بڵاوکردنەوەی ڕاگەیەندراوێک ڕایانگەیاندووە کە هۆشمەند توانیوە لەگەل بنەماڵەکەی بە تەلەفوونی قسە بکات، دۆخی دەروونی باشە و تەنیا دڵەڕاوکێی بڕیاری سەپاندنی حوکمی سێدارەیان هەیە.

ئەو دوو پێشمەرگەی پارتی ئازادی کوردستان، ڕۆژی هەینی (١٢ی گەلاوێژی ٢٧١٨/ ٣ی ئاگۆستی ٢٠١٨) لەلایەن هیزە ئەمنیەتیەکانی ئێرانەوە دەستبەسەر کران.

شەوی ١٦ی گەلاوێژ و تەنیا دوایی ٤ دانپێدانانی زۆرەملەی ئەم دوو پێشمەرگەی پارتی ئازادی لە تلویزیۆنی ئێرانەوە بڵاو کرایەوە.

پارتی ئازادی کوردستان بە بڵاوکردنەوەی بەیاننامەیەک دەڵێت ئەم دوو پێشمەرگە ڕۆژی ١٦ی گەلاوێژ دەستبەسەر کراون.