ڕاپۆرتی هەنگاو لەسەر مانگرتنی کاسبکاران و بازاڕییان لە شارەکانی کوردستان، هاوکات لەگەڵ چوارەمین ساڵیادی کوژرانی حکومەتیی ژینا ئەمینی

هەنگاو؛ چوارشەممە ۲۵ی خەرمانانی ۲۷۲۶

ڕۆژی چوارشەممە ۲۵ی خەرمانانی ۲۷۲۶، هاوکات لەگەڵ چوارەمین ساڵیادی کوژرانی حکومەتیی ژینا ئەمینی لە لایەن هێزە حکومەتییەکانی کۆماری ئیسلامیی ئێران و لە ئەنجامی بانگەوازی «هاوپەیمانیی حیزبەکانی کوردستانی ئێران» بۆ مانگرتنی گشتی، کاسبکاران و بازاڕییان لە ژمارەیەک لە شارەکانی کوردستان مانیان گرتووە.

بەپێی ڤیدیۆ، ڕاپۆرتی گەیشتوو و پشتڕاستکراوەی لە ئەنجامی بەدواداچوونی سەرچاوەکانی ڕێکخراوی مافی مرۆڤی هەنگاو، بەڕێوەچوونی مانگرتن لە لانی کەم ۱۱ شار پشتڕاست دەکرێتەوە و وردەکارییەکانی لە درێژەی ئەم ڕاپۆرتەدا دێت؛

سەقز، زێدی ژینا ئەمینی: سەرەڕای کەشی ئەمنی، مانگرتن بەشێوەی بەربڵاو و بەتەواوی بەڕێوە چووە، بەشێوەیەک کە تەنیا نانەوا و دەرمانخانەکان لە ئاستی شاردا کراوە بوون.

سنە، دیواندەرە، مەهاباد، بۆکان و شنۆ: مانگرتن بەشێوەی بەرفراوان بەڕیوە چووە و هەنگاو ئاستی بەشداریی خەڵک لە مانگرتن لە نێوان ۵۰٪ بۆ ۷۰٪ لێکدەداتەوە.

هەروەها لە شارەکانی قوروە، بیجاڕ، مەریوان، کامێران و پیرانشار: بەشێک لە بازاڕییان و کاسبکاران مانیان گرتووە و ڕێژەی بەشداری لەنێوان ۳۰٪ بۆ ۴۰٪ بووە.

ئەو مانگرتنانە لەحاڵێکدا بەڕێوە چوون کە لە ماوەی سێ ڕۆژی ڕابردوودا ناوەندە ئەمنییەکان بە بانگکردنی بەرفراوانی چالاکانی مەدەنی و بازاڕییان، سەبارەت بە بەشداری لە مانگرتن هۆشدارییان بە خەڵک دابوو. سەبارەت بە هەمان بابەت، لانی کەم ۱۰ هاووڵاتیی کورد لە ماوەی ڕۆژانی ڕابردوودا لە پەیوەندی لەگەڵ مانگرتن لە شارەکانی شنۆ، مەهاباد و سنە دەستبەسەر کراون.

هەروەها لە دوێنێوە هێزە سەرکوتکەرەکانی حکومەت بە چەکی نیوەقورس لە ناوەندی چەند شار وەکوو سەقز، دیواندەرە، سنە و مەریوان جێگیر بوون و کەشی سەربازی بەسەر شاردا زاڵ بووە.

ترساندن، بانگکردنی زۆرەملێ، میلیتاریزەکرانی شارەکان و دەستبەسەرکرانی سەرەڕۆیانەی هاووڵاتییان بە مەبەستی ڕێگری لە مافی ناڕەزایەتی دەربڕین و مانگرتنی ئاشتیخوازانەی خەڵک، سەرکوتی ئازادییە بنەڕەتییەکان و ماددەی ۲۱ (مافی کۆبوونەوە و مانگرتنی ئاشتیخوازانە) لە پەیمانی نێونەتەوەیی مافە مەدەنی و سیاسییەکانە.