دەستبەسەرکرانی هاووڵاتییەکی خەڵکی سنە لەلایەن هێزە ئەمنییەکانەوە

دەستبەسەرکرانی هاووڵاتییەکی خەڵکی سنە لەلایەن هێزە ئەمنییەکانەوە

17:21 - 24 April 2022

 

هەنگاو زانیویەتی کە هاووڵاتییەکی خەڵکی گوندی مێراو سەر بە شاری سنە بە ناوی کەیوان ڕۆستەمی تەمەن ٢٩ ساڵ کوڕی عەلی ئەکبەر و خاڵ مەنیجە لەلایەن هێزە ئەمنییەکانەوە دەستبەسەر کراوە.

بە وتەی سەرچاوەیەکی ئاگادار، کەیوان ڕۆستەمی سەرەتای مانگی خاکەلێوە ون بووە و بەدواداچوونی بەردەوامی بنەماڵەکەی بۆ ئاگادار بوون لە چارەنووسی بێ ئاکام ماوەتەوە هەتا دواجار لە ڕۆژانی ڕابردوودا پەیوەندی بە بنەماڵەکەیەوە گرتووە و وتوویە لە دەستبەسەرگەی ئیدارەی ئیتلاعاتی سنە ڕاگیراوم.

جێگای ئاماژەیە کە بنەماڵەی ڕۆستەمی لە ماوەی ٢٥ ڕۆژی ڕابردوودا چەندین جار سەردانی ئیدارەی ئیتلاعاتی سنەیان کردبوو، بەڵام هەر جار پێیان ڕاگیراوە کە کوڕەکەتان لێرە نییە و هەر بەم هۆیەشەوە گوشارێکی دەروونی زۆریان لە سەر بووە.

هەتا کاتی ئامادە کردنی ئەم هەواڵە هۆکاری دەستبەسەر کران و ئەو تۆمەتانەی کە خراونەتە پاڵ کەیوان ڕۆستەمی نەزانراوە.