سێ هاووڵاتی لە بەندیخانەی کرماشان بە نهێنی لە سێدارە دراون

سێ هاووڵاتی لە بەندیخانەی کرماشان بە نهێنی لە سێدارە دراون

13:44 - 22 February 2021

 

پشتیوانی لە هەنگاو

هەنگاو: نزیک مانگێک لەمەوبەر لانی کەم سێ هاووڵاتیی کورد لە بەندیخانەی ناوەندیی کرماشان بە بێ هیچ جۆرە ئاگاداری و ڕاگەیاندنێک لە سێدارە دراون.

بە گوێرەی هەواڵی گەیشتوو بە ڕێکخراوی مافی مرۆڤی هەنگاو، ڕۆژی دووشەممە ٦ی ڕێبەندانی ٢٧٢٠ (٢٥ی ژانویەی ٢٠٢١)، سێ هاووڵاتیی کورد کە بە تۆمەتی کوشتنی بەئەنقەست سزای لە سێدارەدانیان بۆ بڕابووەوە، سزاکەیان لەسەر جێبەجێ کراوە.

هەواڵنێری هەنگاو ڕایگەیاند ناوی ئەم سێ هاووڵاتییە "هووشەنگ محەمەدی"، "ئەلی ئەنگەزی" و "جەواد مونتەزیریان" بووە و هەرسێکیان بە تۆمەتی کوژرانی کەسانی تر دەستبەسەر کرابوون و سزای سێدارەیان بۆ بڕابووەوە.

بە گوتەی سەرچاوەیەکی ئاگادار، عەلی ئەنگەزی تەمەنی پەنجا ساڵ و خەڵکی گوندی ئەنگەزی سەر بە ناوچەی درود و فەرامانی کرماشان بووە و لە یازدە ساڵ لەمەوبەرەوە لە بەندیخانە بووە و سزای سێدارەی بە سەردا سەپابوو.

هەروەها، هووشەنگ محەمەدی تەمەنی ٤١ ساڵ و خەڵکی گوندی سەخری سەر بە شارۆچکەی فیرووزئاباد بووە و لە چوار ساڵ لەمەوبەرەوە بە تۆمەتی کوشتن لە بەندیخانە بووە.

کەسی سێهەمیش کە هەر ئەو ڕۆژە لە سێدارە دراوە، جەواد مونتەزریان تەمەنی ٤٠ ساڵ و خەلکی کرماشان بووە. ناوبراو لە پێنج ساڵ لەمەوبەرەوە لە بەندیخانەی دیزڵئاوای کرماشان لە بەندکرابوو.