ڕاپۆرتی مانگانەی ڕێکخراوی هەنگاو لە سەر پێشلکاری مافەکانی مرۆڤ لە کوردستان (سەرماوەزی ٢٧٢٠)

ڕاپۆرتی مانگانەی ڕێکخراوی هەنگاو لە سەر پێشلکاری مافەکانی مرۆڤ لە کوردستان (سەرماوەزی ٢٧٢٠)

11:31 - 21 December 2020

 

هەنگاو: لە ماوەی مانگی ڕابردوودا لانیکەم ٧٣ حاڵەتی پێشێلکاری مافەکانی مرۆڤ لە کوردستان تۆمار کراوە.

بە پشتبەستن بە ئاماری تۆمارکراو لە ناوەندی ئامار و بەڵگەنامەکانی ڕێکخراوی مافی مرۆڤی هەنگاو، لە ماوەی مانگی سەرماوەزی ٢٧٢٠ ، لانیکەم ٧٣ حاڵەت پێشلکاری مافەکانی مرۆڤ لە کوردستان تۆمار کراوە کە بە شێوەی خوارەوەیە؛

کۆڵبەران ( ١٦ حاڵەت)

لەماوەی مانگی ڕابردوودا ١٦ کۆڵبەر و کاسبکار لە سنوورەکانی کوردستان بوونەتە قوربانی کە ٣ کەسیان گیانیان لە دەست. هەر سێ کەسەکە بە تەقەی ڕاستەوخۆی هێزە چەکدارەکانی ئێران گیانیان لە دەست داوە.

 هەروەها ١٣ کۆڵبەر بریندار بوون کە ١١ حاڵەتی بە تەقەی ڕاستەوخۆ بووە و دوو کەسیش بە هۆی تەقینەوەی مین و بەربوونەوە لە هەڵدێر بریندار بوون.


سێدارە و گیان لە دەست دان لە بەندیخانە (٣ حاڵەت)

لە مانگی سەرماوەزی ئەمساڵ لاینکەم ٣ هاووڵاتیی کورد لە بەندیخانەکانی مەهاباد، میاندواو و سەقز لەسێدارە دراون. هەر سێ کەسەکە بە تۆمەتی قەتڵی ئەنقەست ئەو حوکمەیان بە سەردا سەپابوو.
هەروەها، لەو ماوەیەدا گیان لە دەستدانی بەندکراوانی کورد لە بەندیخانەکانی ئێران و کوردستان تۆمار نەکراوە.

 

کوژان و بریندار بوونی هاووڵاتیانی مەدەنی و تەقینەوەی مین (٣ حاڵەت)

لە ماوەی مانگی ڕابردوودا، سێ هاووڵاتیی کورد لە سنوورەکانی چالدێران، سەوڵاوا و شنۆ به هۆی تەقینەوەی مین بوونەتە قوربانی کە کەسێکیان گیانی لە دەست داوە.

هەروەها، لەو ماوەیەدا هیچ حاڵەتێکی کوژران و بریندار بوونی هاووڵاتیانی مەدەنی بە تەقەی ڕاستەوخۆی هێزە چەکدارەکانی ئێران تۆمار نەکراوە.


دەستبەسەر کران و سەپاندنی حوکم (٤٧ حاڵەت)

بە پشتبەستن بە ئامارەکانی هەنگاو، لەماوەی مانگی ڕابردوودا لانیکەم ٣٣ هاووڵاتیی کورد لەلایەن ناوەندە ئەمنییەکانی حکوومەتی ئێرانەوە بە تۆمەتی چالاکی سیاسی و مەدەنییەوە دەستبەسەر کراون کە دوو کەسیان مێرمنداڵ بوون.

هەروەها، ١٤ هاووڵاتیی کورد بە تۆمەتی چالاکی سیاسی، مەزهەبی و مەدەنی سەرجەم حوکمی ٤٣ ساڵ و ٦ مانگ بەندکرانیان بە سەردا سەپاوە.

 

کرێکاری (٤ حاڵەت)

لەو ماوەیەدا لانیکەم ٤ کرێکاری خەڵکی شارەکانی پاوە، سنە، ئورمیە و بۆکان لە کاتی کار کردن و بە هۆی ڕووداوی کارەوە گیانی لە دەست داوە. دوو کەسیان لە هەرێمی کوردستان گیانیان لە دەست داوە.