هەنگاو؛ سێشەممە ١ی خاکەلێوەی ٢٧٢٣
لە ڕێوڕەسمەکانی نەورۆز لە شارە جیاوازەکانی کوردستان خەڵک دروشمی دژە حکوومەتییان وتووەتەوە و ناڕەزایەتی خۆیان دەربڕی، کە هێزە سەرکوتکارەکانی حکوومەت لە وەڵامدا خەڵکیان دایە بەر دەستڕێژ و بەهۆیەوە زیاتر لە ٤٠ هاووڵاتیی بریندار بوون.
بەپێی ڕاپۆرتی گەیشتوو بە ڕێکخراوی مافی مرۆڤی هەنگاو، کۆتایییەکانی شەوی دووشەممە ٢٩ی ڕەشەممەی ٢٧٢٢ و کاتژمێرە سەرەتایییەکانی سێشەممە ١ی خاکەلێوەی ٢٧٢٣، لە شارەکانی مەهاباد، بوڵواناوا سەر بە دێولان، سەقز و سنە خەڵک کە بۆ بەڕێوەبردنی ڕێوڕەسمی نەورۆز ڕژابوونەوە سەر شەقامەکان، درانە بەر دەستڕێژی ڕاستەوخۆی هێزەکانی حکوومەت و زیاتر لە ٤٠ کەس برینداربوون.
بەپێی ئەو ڤیدیۆییانەی لە شاری مەهابادەوە دەستی هەنگاو گەیشتوون، لە سەرەتاکانی بەرەبەیانی ئەمڕۆ هێزەکانی سوپای پاسداران ڕاستەوخۆ خەڵک کە دروشمی "شەهید نامرێت" و "ژن، ژیان، ئازاد"یان دەوتەوە داوەتە بەر دەستڕێژ و زیاتر لە ٣٠ هاووڵاتی برینداربوون. بەوتەی سەرچاوەکانی هەنگاو زۆرترین بریندارەکان ژن و منداڵ بوون.
هەروەها، لە شاری سەقز و بەتایبەتی لە گەڕەکی کەریم ئاوای ئەم شارە، سەرەڕای فڕێدانی گازی فرمێسک ڕێژ، هێزەکانی حکوومەت ڕاستەوخۆ تەقەیان لە خەڵک کردووە، کە هەنگاو برینداربوونی ٩ کەس پشتڕاست دەکاتەوە کە ٢ کەسیان ژن بوون.
لە شارۆچکەی بوڵواناوا سەر بە شاری دێولان هێزەکانی حکوومەت ڕاستەوخۆ تەقەیان لە خەڵک کرد کە بەهۆیەوە لانی کەم ٣ کەس بریندارکران. شیاوی ئاماژەپێدانە کە دوای بڵاوبوونەوەی ئەم هەواڵە خەڵکی دێولان ڕژانە سەر شەقامەکان و بە داخستنی ڕێگاکان و لێدانی هۆڕن بە شێوەیەکی بەردەوام پشتیوانی خۆیان لە خەڵکی بڵواناوا و ناڕەزایەتی خۆیان لەبەرانبەر توندوتیژیی و سەرکوتکارییەکانی هێزەکانی حکومەت دەربڕی.
هێزەکانی حکوومەت لە چەند گەڕەکێکی شاری سنە هێرشیان کردە سەر ڕێوڕەسمەکانی نەورۆز و بەپێی ڕاپۆرتە سەرەتاییەکان چەندین هاووڵاتیی بریندارکراون.
