شەش مانگ بەسەر ناڕوونی چارەنووسی کامەران و زاهیر مومنی، باوک و کوڕی خەڵکی مەهاباددا تێدەپەڕێت

هەنگاو: سێشەممە ١٩ی بانەمەڕی ٢٧٢٣

چارەنووسی کامەران موئمنی و کوڕەکەی، زاهیر موئمنی کە شەش مانگ پێش و لە ڕەوتی شۆڕشی "ژن، ژیان، ئازادی" دا لە مەهاباد دەستبەسەرکرابوون، هەتا ئێستا ناڕوونە و بەبێ هەبوونی هیچ چەشنە پەیوەندییەک لە بەندیخانەی ئەم شارەدا ڕاگیراون.

بەپێی ڕاپۆرتی گەیشتوو بە ڕێکخراوی مافی مرۆڤی هەنگاو، کامران موئمنی، تەمەن ٥٤ ساڵ و کوڕەکەی بەناوی زاهیر موئمنی، تەمەن ٢٥ ساڵ، لەدوای دەستبەسەرکرانیانەوە هەتا ئێستا لە بەندیخانەی ناوەندیی ئەم شارە چارەنووسیان ناڕوونە.

بەوتەی سەرچاوەیەکی ئاگادار، کامەران موئمنی و کوڕەکەی، زاهیر موئمنی لە ماوەی نزیک بە شەش مانگی دەستبەسەریاندا، لە مافی دەستڕاگەیشتن بە پارێزەر و چاوپێکەوتن لەگەڵ بنەماڵەکەیان بێبەریبوبوون.

ئەم باوک و کوڕەی خەڵکی مەهاباد لە ڕۆژی چوارشەممە ٢٥ی خەزەڵوەری ٢٧٢٢ (١٦ی نۆڤەمبەری ٢٠٢٢) لە ڕەوتی خۆپیشاندانە جەماوەرییەکانی شاری مەهاباد دەستبەسەرکران.