بناو؛ دەستبەسەرکران و نادیاری چارەنووسی حوسێن پایە هاووڵاتیی خەڵکی شاری نەغەدە

هەنگاو؛ دووشەممە ١٥ی خەزەڵوەری ٢٧٢٣

هاووڵاتییەکی کوردی نیشتەجێی بناو بەناوی حوسێن پایە، لە ١٥ ڕۆژ پێشەوە لەلایەن هێزە ئەمنییەکانی کۆماری ئیسلامیی ئێرانەوە دەستبەسەرکراوە و هەتا ئێستا چارەنووسی نادیارە.

بەپێی ڕاپۆرتی گەیشتوو بە ڕێکخراوی مافی مرۆڤی هەنگاو، حوسێن پایە، هاووڵاتییەکی لاوی خەڵکی نەغەدە و نیشتەجێی بناو، ماوەی پازدە ڕۆژە کە لەلایەن هێزەکانی وەزارەتی ئیتلاعاتەوە دەستبەسەرکراوە و بۆ شوێنێکی نادیار گواستراوەتەوە.

بەوتەی سەرچاوەیەکی ئاگادار، حوسێن پایە، هەتا ئێستا پەیوەندییەکی تەلەفۆنیی بە بنەماڵەکەیەوەنەبووە و بەدواداچوونی بنەماڵەکەی لەسەر بارودۆخی ئەو هاووڵاتییە لەلایەن هێزەکانی ئیدارەی ئیتلاعاتی بناو بێ وەڵام ماوەتەوە و ئاکامێکی نەبووە.

هەتا کاتی داڕشتنی ئەم هەواڵە لە هۆکاری دەستبەسەرکران و ئەو تۆمەتانەی دراونەتە پاڵ حوسێن پایە و دۆخی ڕاگرتنی ناوبراو زانیارییەکی ورد لەبەر دەستدا نییە.

حوسێن پایە، ڕۆژی ٣٠ی ڕەزبەری ٢٧٢٣ (٢٢ی ئۆکتۆبەری ٢٠٢٣)، لە لایەن ژمارەیەک لە هێزەکانی وەزارەتی ئیتلاعاتەوە لە شاری بناو دەستبەسەرکرابوو.