گرووپی هەڵۆکانی زاگرۆس بەرپرسیارێتی کوشتنی ئەندامێکی سوپای پاسدارانی بە ئەستۆ گرت

هەنگاو: گرووپی هەڵۆکانی زاگرۆس بەرپرسیارێتی کوشتنی ئەندامێکی سوپای پاسدارانی لە شاری پیرانشار سەر بە پارێزگای ئورمیە بە ئەستۆ گرت.

بەپێی هەواڵی گەیشتوو بە ڕێکخراوی مافی مرۆڤی ”هەنگاو“، کاتژمێر ٨:٣٠ دەقەی ئەمشەو (٢٠ی پووشپەڕێ ٢٧١٨ / ١١ی ژوئیەی ٢٠١٨)، چەند کەسێکی چەکدار لە پیرانشر هێرشیان کردە سەر ئەندامێکی سوپای پاسداران بە ناوی ”حوسێن شوانکارە“ و داویانە بەر دەستڕێژی گوللە و لەئاکامدا کوژرا.

بە وتەی سەرچاوەیەکی ئاگادار، حوسین شوانکارە خەڵکی پیرانشار و ئەندامی فەرمیی سوپای پاسداران بووە کە لە تیرۆری دەیان کادر و پێشمەرگەی حیزبەکانی ڕۆژهەڵات لەنێو خاکی باشووری کوردستان دەستی هەبووە.

گرووپی هەڵۆکانی زاگرۆس کە گرووپێکی چەکداری نزیک لە حیزبی دێموکراتی کوردستانی ئێران بە بڵاوکردنەوەی بەیاننامەیەک بەرپرسیارێتی ئەو هێرشەی گرتووەتە ئەستۆ.